22 ᐱᔅᑭᑎᓯᓂᐦᐄᑭᓐ ᐐᔓᐙᐎᓐ

ᐊᓂᑎᐦ 22 ᑳ ᐄᑎᓯᓈᑖᒡ ᐱᔅᑭᑎᓯᓂᐦᐄᑭᓐ ᒉᐃᒥᔅ ᐯᐃᐦ ᓂᔅᑯᒧᐎᓂᐦᒡ ᐋᑯᑎ ᑳ ᐅᔑᐦᑖᑭᓂᐎᒡ ᓈᔥᒡ ᐋᐦ ᒋᔥᑎᒫᐎᐦᒡ ᔮᔨᑖ ᒑ ᒥᔪᓈᓈᑭᒋᔥᑖᑭᓂᐎᒡ ᐊᔅᒌ ᑭᔮᐦ ᐱᒫᑎᓰᐎᓐ, ᒋᒡ ᑭᔮᐦ ᐋᐦ ᓂᑑᐦᐅᓈᓂᐎᒡ, ᐋᐦ ᓅᑎᒫᓵᓂᐎᒡ ᑭᔮᐦ ᐋᐦ ᐎᓂᐦᐄᒑᓂᐎᒡ ᒫᓯᓈᑖᒡ ᐊᓂᑎᐦ 24 ᐱᔅᑭᑎᓯᓂᐦᐄᑭᓂᐦᒡ ᐐᔓᐙᐎᓂᐦᒡ᙮

ᐋᔑ ᒥᓯᓈᑖᒡ 22᙮2᙮4 ᒉᐃᒥᔅ ᐯᐃᐦ ᐐᔓᐙᐎᓂᐦᒡ, ᐹᔨᑯᔥᑖᐤ ᑎᐦᑐ ᒑᒀᓐ ᑭᔮᐦ ᒥᓯᓈᑖᐤ ᔮᔨᑖ ᒑ ᑭᓂᐙᐱᐦᑎᑭᓂᐎᒡ 22 ᐱᔅᑭᑎᓯᓂᐦᐄᑭᓂᐦᒡ:

  • ᔮᔨᑖ ᒑ ᑭᓂᐙᔨᐦᑎᑭᓂᐎᒡᐦ ᐋᐦ ᓂᑑᐦᐅᓈᓂᐎᒡ, ᐋᐦ ᓅᑎᒫᓵᓂᐎᒡ ᑭᔮᐦ ᐋᐦ ᐎᓂᐦᐄᒑᓂᐎᒡ ᐄᔨᔨᐅᒡ ᐅᑭᔅᒋᐦᐅᐎᓂᐧᐋᐤᐦ ᐅᑖᐦ ᐊᑎᒫᐲᓯᒻ, ᑭᔮᐦ ᑯᑎᒃᐦ ᐅᑭᔅᒋᐦᐅᐎᓂᐙᐤᐦ ᐊᓂᑎᐦ ᐹᔨᒄ ᑳ ᐄᒋᔥᑖᔨᒡ ᐊᔅᒌᔨᐤ, ᐅᐦᒋ ᐊᓂᔮ ᒑ ᑖᐦᑭᐦᐄᒑᐱᔨᔨᒡ ᐋᐱᑎᓰᓈᓂᐎᐎᔨᒑ ᐅᑖᐦ ᐊᑎᒫᐲᓯᒻ᙮
  • ᐋᐦ ᒥᓈᒋᔥᑖᑭᓂᐎᒡ ᐊᔅᒌ ᑭᔮᐦ ᐱᒫᑎᓰᐎᓐ ᐋᑳ ᓈᔥᒡ ᒑ ᐎᓈᒋᔥᑖᑭᓂᐎᒡ ᐄᔨᔨᐤ ᐱᒫᑎᓰᐎᓐ ᐅᐦᒋ ᐊᓐ ᒑ ᐄᔑ ᐋᐱᑎᓰᓈᓂᐎᒡ ᐅᑖᐦ ᐊᑎᒫᐲᓯᒻ;
  • ᒑ ᒥᓈᒋᔥᑖᑭᓂᐎᒡ ᐄᔨᔨᐤ ᐱᒫᑎᓰᐎᓐ, ᐋᐦ ᒥᓈᔨᑎᒡ, ᐅᑎᐦᑖᐎᓂᐧᐋᐤᐦ, ᐋᔑ ᐱᑳᔅᒋᐦᐅᓈᓂᐎᒡ, ᐅᐦᒋ ᐊᓐ ᐋᐦ ᐋᐱᑎᓰᓈᓂᐎᒡ ᐋᐦ ᐎᓈᒋᐦᐄᐙᒡ ᑭᔮᐦ ᐋᐦ ᑖᐦᑭᐦᐄᒑᐱᔨᒡ ᐅᑖᐦ ᐊᑎᒫᐲᓯᒻ;
  • ᐋᐦ ᐐᐦ ᒥᓈᒋᔥᑖᑭᓂᐎᒡ ᐊᓐ ᓈᑑᐦᐅᓂᐎᒡ, ᐋᑎ ᐄᔨᔑᓈᑯᐦᒡ ᐊᔅᒌ ᑭᔮᐦ ᐊᓐ ᒑᒀᓐ ᓈᐦᑖᐅᒋᐦᒡ, ᑭᔮᐦ ᒥᓯᐙ ᒑᒀᓐ ᐋᔑᐱᒫᑎᓰᒥᑭᐦᒡ ᐅᑖᐦ ᐊᑎᒫᐲᓯᒻ ᐄᔅᑯᑎᒃ ᐋᐱᑎᓰᓈᓂᒞ ᐅᑖᐦ;
  • ᒑ ᒥᔪᒋᔅᒑᔨᐦᑖᑯᓂᔨᒡᐦ ᐄᔨᔨᐅᒡ ᐅᑭᔅᒋᐦᐅᐎᓂᐧᐋᐤᐦ ᐅᑎᐦ ᓃᔓ ᑳ ᐄᒋᔥᑖᔨᒡ ᐊᔅᒌᔨᐤ ᑭᔮᐦ ᒑ ᐐᐦᒑᑐᒥᑭᐦᒡᐦ ᐋᔑ ᒥᓯᓈᑖᒡ ᐊᓐ 24 ᒃᐱᔅᑭᑎᓯᓂᐦᐄᑭᓐ ᐹᑎᔥ ᒌᐦ ᒑᔥᑎᓈᑖᔮᔨᐦᑖᑯᒑ ᒑ ᐄᑖᐱᑎᐦᒡ ᐊᔅᒌ;
  • ᔮᔨᑖ ᒑ ᐐᒋᐦᐄᐙᒡ ᐄᔨᔨᐅᒡ ᐋᐦ ᐱᒥᐱᔨᐦᑖᑭᓂᐎᐎᔨᒡ ᐅᔮ ᐐᔓᐙᐎᓂᔨᐤ;
  • ᒑ ᑭᓂᐙᐱᐦᑎᑭᓂᐎᐎᔨᒡᐦ ᐅᑭᔅᒋᐦᐅᐎᓂᐧᐋᐤᐦ ᑭᔮᐦ ᐄᔨᐦᒡ ᐋᐦ ᐄᑎᔅᑳᓈᓯᒡ ᐊᐙᓂᒌ, ᑖᓐ ᒥᒄ ᐋᔑᓈᑯᓂᔨᒡ;
  • ᒑ ᓂᐦᐋᔨᐦᑖᑯᓂᔨᒡ ᐊᐙᓂᒌ ᒑ ᒌᐦ ᐃᐦᑐᑎᐦᒡ ᐋᐱᑎᓰᐎᓂᔨᐤ ᒥᒄ ᔮᔨᑖ ᒑ ᑯᐃᔅᒄ ᒑ ᑭᓂᐙᐱᐦᑎᐦᒡ ᐊᓂᔮ ᐋᑎᔓᐙᓂᐎᐎᔨᒡ ᐅᑖᐦ ᐊᑎᒫᐲᓯᒻ;
  • ᓈᔥᒡ ᒑ ᐐᐦ ᒥᓈᒋᔥᑖᑭᓂᐎᒡ ᐊᔅᒌ ᑭᔮᐦ ᐱᒫᑎᓰᐎᓐ ᐋᐱᑎᓰᓈᓂᐎᐎᒑ ᓲᐦᒃ ᐋᐦ ᑯᒋᔥᑖᑭᓂᐎᒡ ᒑ ᐃᐦᑐᑎᑭᓂᐎᒡ ᐊᓐ ᑳ ᐄᔑ ᓂᑎᐙᔨᐦᑖᑯᐦᒡ ᑭᔮᐦ ᒫᒃ ᐹᑯᓵᔨᐦᑖᑯᐦᒡ ᐋᐦ ᒌᐦ ᓈᓂᑑᒋᔅᒑᔨᐦᑖᑯᐦᒡ ᒑ ᐄᔑ ᑖᐦᑭᐦᐄᒑᐱᔨᒡ ᑭᔮᐦ ᒦᓐ ᒑ ᑭᓂᐙᐱᐦᑎᐦᑭᓂᐎᒡ ᐊᓂᑖᐦ ᒑ ᐃᐦᑐᑖᑭᓂᐎᒡ᙮

ᐊᓂᑎᐦ 22 ᑳ ᐄᑎᓯᓈᑖᒡ ᐱᔅᑭᑎᓯᓂᐦᐄᑭᓐ ᓂᔅᑯᒧᐎᓂᐦᒡ ᐐᔓᐙᐎᓐ ᐋᑯᑎᐦ ᒫᓯᓈᑖᒡ ᔮᔨᑖ ᒑ ᐐᒋᐦᐄᐙᒡ ᐄᔨᔨᐅᒡ ᐋᐦ ᐋᔨᒧᑖᔨᒡ ᐊᔅᒌᔨᐤ ᑭᔮᐦ ᐱᒫᑎᓰᐎᓂᔨᐤ ᐋᐦ ᐐᐦ ᒥᓈᒋᔥᑖᑭᓂᐎᐎᔨᒡ, ᒥᔑᐤ ᑖᐦᑭᐦᐄᒑᐱᔨᔨᒑ ᐅᑭᔅᒋᐦᐅᐎᓂᐙᐦᒡ, ‘ᐊᑎᑎᐤ ᐐᔨᐙᐤ ᒑ ᐋᔥᑎᓈᑭᓂᐅᐎᒡ ᐄᔥᐱᔑᐐ ᑯᑎᒃᐦ ᐊᐙᔨᐤ’ ᐋᐦ ᐋᔨᒥᐦᐋᑭᓂᐅᐎᒡ ᑭᔮᐦ ᐋᐦ ᐐᑎᐱᐦᒑᒧᒡ ᐹᒥᐱᔨᐦᑖᑭᓂᐎᐎᔨᒡᐦ ᐅᔮ ᐃᔮᔨᒧᑖᔨᒡᐦ᙮

ᐊᓂᑎᐦ ᒉᐃᒥᔅ ᐯᐃᐦ ᓂᔅᑯᒧᐎᓂᐦᒡ 24 ᐱᔅᑭᑎᓯᓂᐦᐄᑭᓂᐦᒡ ᐋᑯᑎᐦ ᒫᓯᓈᑖᒡ ᐐᔓᐙᐎᓐ ᒑ ᐄᔅᐱᔨᐦᑖᑭᓂᐎᒡ ᐋᐦ ᓂᑑᐦᐅᓈᓂᐎᒡ, ᐋᐦ ᓅᑎᒫᓵᓂᐎᒡ ᑭᔮᐦ ᐋᐦ ᐎᓂᐦᐄᒑᓂᐎᒡ ᑭᔮᐦ ᐋᐦ ᑭᓂᐙᐱᐦᑎᑭᓂᐎᐎᔨᒡᐦ ᐄᔨᔨᐅᒡ ᐅᑭᔅᒋᐦᐅᐎᓂᐙᐤᐦ:

  • ᒥᒄ ᐋᑎ ᐃᔨᔅᐱᐦᑖᔮᔨᒡ ᒋᑭ ᒌᐦ ᓂᑑᐦᐅᐎᒡ ᐄᔨᔨᐅᒡ, ᒥᒄ ᑖᓂᑖᐦ ᐙᐦ ᓂᑑᐦᐅᒡ ᐅᑖᐦ ᐊᑎᒫᐲᓯᒻ, ᐋᑳ ᐊᐙᔨᐤᐦ ᐐᔓᒥᑯᒡ ᑭᔮᐦ ᓈᔥᒡ ᓈᑭᑎᐙᔨᐦᑖᑯᓂᔨᒡ ᒑ ᒌᐦ ᐐᔓᒫᑭᓂᐅᐎᒡ ᑭᔮᐦ ᐋᑳ ᒑ ᑖᐦᑭᐦᐅᑯᒡ ᐐᔓᐙᐎᓐᐦ;
  • ᒥᒄ ᐄᔨᔨᐅᒡ ᓂᐦᐋᔨᐦᑖᑯᓱᐎᒡ ᒑ ᒌᐦ ᐎᓂᐦᐄᒑᒡ ᐅᑖᐦ ᒥᓯᐦᑖ ᐊᑎᒫᐲᓯᒻ;
  • ᐱᔥᒡ ᐊᔅᒌ, ᐊᓐ ᐹᔨᒄ ᑭᔮᐦ ᓃᔓ ᑳ ᐄᒋᔥᑖᒡ ᐊᔅᒌ, ᑭᔮᐦ ᐱᔥᒡ ᐋᐦ ᐄᔑᓈᑯᓂᔨᒡ ᓂᑑᐦᐅᐎᓂᔨᐤ ᐐᔨᐙᐤ ᒥᒄ ᐄᔨᔨᐅᒡ ᓂᐦᐋᔨᐦᑖᑯᓯᐎᒡ ᒑ ᒥᓈᐦᐅᒡ (ᐱᑯᓂᒑ, ᐊᑎᐦᑭᒫᒄᐦ, ᓂᒫᐤᐦ, ᓂᒫᐲᐦ, ᒥᔮᐦᑭᑐᐃᐦ, ᓅᑎᒥᔨᐙᓯᐤᐦ, ᒥᓯᐙ ᐋᐦ ᐋᐱᔖᔑᒡ ᐊᔪᐎᓂᔨᐤ, ᐊᒥᔅᒄᐦ, ᐱᔑᐤ, ᒥᐦᒑᔑᐤᐦ; ᑭᔮᐦ ᒋᔖᔮᒄᐦ ᐅᑖᐦ ᐊᑎᒫᐲᓯᒻ 50 ᐋᐦ ᐄᑎᓯᓂᐦᐄᑭᓂᐎᐎᔨᐅᒡ ᐊᔅᒌᔨᐤ);
  • ᐋᑳ ᐙᔪᑎᓂᔨᒡ ᐊᓂᔮ ᒑ ᒌᐦ ᓂᐱᐦᑖᑭᓂᐎᐎᔨᑯᐱᓈ, ᐐᔨᐙᐤ ᒥᒄ ᐄᔨᔨᐅᒡ ᒋᑭ ᒌᐦ ᒥᓂᐦᐅᐎᒡ ᐄᔥᐱᔑᐐ ᐄᔨᐦᒡ ᐋᐦ ᐄᑎᔅᑳᓈᓯᔨᒡᐦ ᐊᐙᔨᐤᐦ (ᐱᑯᓂᒑ ᐋᐦ ᓂᑑᐦᐅᓈᓂᐎᐎᔨᒡ ᑭᔮᐦ ᐋᐦ ᓅᑎᒫᓵᓂᐎᐎᔨᒡ ᐋᑳ ᐊᓂᑎᐦ ᐅᐦᑖᒋᐦᐅᓈᓂᐎᐎᔨᒡ)᙮

ᐊᓐ ᐐᔓᐙᐎᓐ ᐅᐦᒋ ᐋᐦ ᓂᑑᐦᐅᓈᓂᐎᒡ, ᐋᐦ ᓅᑎᒫᓵᓂᐎᒡ ᑭᔮᐦ ᐋᐦ ᐎᓂᐦᐄᒑᓂᐎᒡ ᐋᑯᑎᐦ ᐙᐦᒋ ᒌᐦᑳᔮᐱᐦᑎᑭᓂᐎᐎᔨᒡᐦ ᐄᔨᔨᐅᒡ ᐅᑭᔅᒋᐦᐅᐎᓂᐙᐤᐦ ᐋᐦ ᓈᓈᑭᒋᔥᑖᑭᓂᐎᐎᔨᒡᐦ ᐅᓂᑑᐦᐅᔅᒌᐙᐤᐦ ᐊᓂᑎᐦ ᒑ ᒌ ᐅᐦᒋ ᒥᓂᐦᐅᒡ᙮ ᑭᓂᐙᐱᒫᑭᓂᒡ ᐋᐅᑯᓂᒡ ᐙᔮᔨᐦᑎᐦᒡ ᒑ ᐄᐦᑎᓈᓂᐎᐎᔨᒡ ᐊᓂᑎᐦ ᐅᓂᑑᐦᐅᔅᒌᐙᐦᒡ, ᑭᔮᐦ ᑯᑎᒡ ᒑᒀᓐ ᐋᐦ ᑭᓂᐙᐱᐦᑎᑭᓂᐎᒡ, ᐊᓂᔮ ᒑ ᐋᑎ ᐃᔨᐦᑎᓈᓂᐎᐎᓂᐎᐎᔨᒡ ᐅᐦᒋ ᐋᐦ ᐐᐦ ᓈᓈᑭᒋᔥᑖᒡ ᓂᑑᐦᐅᐎᓂᔨᐤ᙮