ᐱᔅᑭᑎᓯᓂᐦᐄᑭᓂᐦᒡ 5 ᑳ ᐄᑎᓯᓈᑖᒡ ᒉᐃᒥᔅ ᐯᐃᐦ ᓂᔅᑯᒧᐎᓂᐦᒡ ᐋᑯᑎᐦ ᒫᓯᓈᑖᒡ ᐊᓐ ᒑ ᒌᐦ ᐄᔑ ᐋᐱᑎᐦᒡ ᐊᔅᒌ:
- ᐹᔨᒄ ᑳ ᐄᒋᔥᑖᒡ ᐊᔅᒌ (1) ᐙᐐᓵᐙ 5,500 ᑳ ᑭᒌᐦᒑᔮᒡ ᑳᑎᐦᒀᒡ ᑎᐱᐦᐄᑭᓐ ᐄᔥᐱᔖᐤ: ᐋᔪᐎᒄ ᒥᒄ ᔮᔨᑖ ᐐᔨᐙᐤ ᐄᔨᔨᐅᒡ ᒑ ᐋᐱᒋᔥᑖᒡ; ᐊᓂᑖᐦ ᐐᔨᐙᐤ ᐋᐦ ᐅᐦᒋ ᐅᒋᒫᐅᓈᓂᐎᐎᔨᒡ ᐅᑎᐦᑕᐎᓂᐙᐦᒡ ᐋᐦ ᐅᐦᒋ ᐱᒥᐱᔨᐦᑖᑭᓂᐎᐎᔨᒡ ᐄᔨᔨᐅᑎᐹᔨᐦᒋᒑᓰᓈᐦᒡ ᐋᐦ ᐅᐦᒋ ᔒᑐᔥᑭᑭᓂᐎᐎᔨᒡ;
- ᓃᔓ ᑳ ᐄᒋᔥᑖᒡ ᐊᔅᒌ (2) ᐙᐐᓵᐙ 70,000 ᑳ ᑭᒌᐦᒑᔮᒡ ᑳᑎᐦᒀᒡ ᑎᐱᐦᐄᑭᓐ ᐄᔥᐱᔖᐤ: ᒥᓯᐙ ᑯᐯᒃ ᐊᐙᓂᒌ ᐋᐦ ᐃᐦᑖᒡ ᒋᑭ ᒌᐦ ᐋᐱᒋᔥᑖᐎᒡ, ᒥᒄ ᒫᒃ ᐄᔨᔨᐅᒡ ᐋᐅᑯᓂᒡ ᒥᒄ ᒑ ᒌᐦ ᓂᑑᐦᐅᒡ ᑭᔮᐦ ᓅᑎᒫᓵᒡ ᑭᔮᐦ ᓂᒧᐃ ᐄᔨᐦᒡ ᒋᑭ ᒌᐦ ᐄᔑ ᐋᐱᒋᔥᑖᑭᓂᐆ ᐆ ᐊᔅᒌ ᐹᑎᔥ ᒦᔥᑯᒡ ᐱᒋᔅᑎᓂᑭᓂᐎᒑ ᐊᓐ ᓂᐦᐋᐤ ᐋᐦ ᐄᔥᐱᔖᒡ ᐊᔅᒌ ᑭᔮᐦ ᒫᒃ ᑎᐱᐦᐄᒑᓂᐎᒑ, ᑭᔮᐦ ᒋᑭ ᒌᐦ ᐋᐱᒋᔥᑖᐤ ᐄᔨᔨᐅᑎᐹᔨᐦᒋᒑᓯᐤ ᐅᐎᒋᒫᐎᐎᓐ;
- ᓂᔥᑐ ᑳ ᐄᒋᔥᑖᒡ ᐊᔅᒌ (3) ᐙᐐᓵᐙ 277,000 ᑳ ᑭᒌᐦᒑᔮᒡ ᑳᑎᐦᒀᒡ ᑎᐱᐦᐄᑭᓐ ᐄᔥᐱᔖᐤ: ᒥᓯᐙ ᐊᐙᓐ ᐅᑎᐦ ᑯᐯᒃ ᒋᑭ ᒌᐦ ᐋᐱᒋᔥᑖᐤ ᐋᐦ ᓈᓈᑭᒋᐦᐄᑯᔾ ᐄᔨᔨᐅᑎᐹᔨᐦᒋᒑᓯᐤᐦ ᐅᑖᐦ ᒉᐃᒥᔅ ᐯᐃᐦ ᒥᒄ ᐄᔨᔨᐤ ᐋᐦ ᓂᐦᐋᔨᐦᑖᑯᓯᒡ ᒑ ᒌᐦ ᐎᓂᐦᐋᒧᐙᔨᒡᐦ ᐅᔅᑎᔅᑭᒥᒡ ᐹᐹᒥᐱᐦᑖᔨᒡᐦ ᑭᔮᐦ ᒥᒄ ᐊᓂᔮᐦ ᓈᐦᐋᔨᐦᑖᑯᓯᑦ ᐋᐦ ᐄᓯᓈᑯᓯᔨᒡᐦ ᓂᒫᔅᐦ ᒑ ᒌᐦ ᓂᐱᐦᐋᒡ, ᑭᔮᐦ ᑯᑎᑭᒡ ᐊᐙᓂᒌ ᒋᑭᒌᐦ ᓂᑑᐦᐅᐎᒡ ᑭᔮᐦ ᓅᑎᒫᓵᐎᒡ᙮
