ᒑ ᐄᔑ ᐐᒋᐦᑖᑭᓂᐎᒡ ᑭᔮᐦ ᐋᐱᒋᔥᑖᑭᓂᐎᒡ ᐐᐦᑎᒫᒑᐎᓐ
ᐅᑖᐦ ᐅᐦᒋ ᐲᓯᒸᐦᑖᐦᒡ ᐋᐦ ᐅᐦᒋ ᓈᓈᑭᒋᔥᑖᑭᓂᐎᒡ ᐊᔅᒌ, ᒑ ᐄᔑ ᑖᐦᑭᐦᐄᒑᐱᔨᒡ ᐋᐱᑎᓰᓈᓂᐎᒑ ᑭᔮᐦ ᐅᑖᐦ ᐅᐦᒋ ᑳᐦᓈᑖᐦ ᑎᐹᔨᐦᒋᒑᓰᓈᐦᒡ ᐋᐦ ᐅᐦᒋ ᓈᓈᑭᒋᔥᑖᑭᓂᐎᒡ ᐊᔅᒌ ᑭᔮᐦ ᐱᒫᑎᓰᐎᓐ ᔮᔨᑖ ᒑ ᐐᐦ ᒥᓈᒋᔥᑖᑭᓂᐎᒡ ᑭᔮᐦ ᒑ ᐐᐦ ᒑᔥᒋᓈᒋᔥᑖᒡ ᐋᔑ ᐎᔮᔨᐦᑖᑯᐦᒡ ᐊᓐ 22 ᐱᔅᑭᑎᓯᓐᓂᐦᐄᑭᓂᐦᒡ ᒫᓯᓈᑖᒡ ᒑ ᐄᔑ ᐱᒥᐱᔨᐦᑖᑭᓂᐎᒡ᙮
ᐋᐦᒸᔮᐦ ᒫᒃ ᒥᓯᐙ ᐊᐙᓐ ᒋᔅᒑᔨᐦᑎᔮᓂᐎᑦ ᐱᑎᒫ ᔮᔨᑖ ᐋᔨᒧᑎᒧᐙᑭᓂᐅᐎᒡ ᐊᓂᐦᐄ ᒦᓐ ᒑ ᑭᓂᐙᐱᐦᑎᑭᓂᐎᒡᐦ, ᒌᐦ ᓈᓂᑑᒋᔅᒑᔨᐦᑎᐦᒀᐙ ᐊᓂᒌ ᐊᔅᒌ ᑭᔮᐦ ᐱᒫᑎᓰᐎᓂᔨᐤ ᐋᐦ ᐐᐦ ᒥᓈᒋᔥᑖᑭᓂᐎᐎᔨᒡ ᑳᓂᐙᐱᐦᑎᐦᒡ, ᐋᐦᒸᔮᐦ ᐐᐦᑎᐦᒡ ᐊᓂᔮ ᐋᔑ ᐱᑯᓵᔨᐦᑎᐦᒡ ᒑ ᐃᐦᑐᑎᑭᓂᐎᐎᔨᒡ ᐅᑖᐦ ᐄᔑ ᐅᒋᒫᓈᐦᒡ᙮ ᐋᑦ ᑭᔨᑆ ᓂᑎᐙᔨᐦᑖᑯᓯᒡ ᒑ ᐐᒋᐦᐄᐙᒡ ᐊᓂᒌ ᐙᐦ ᐱᒥᐱᔨᐦᑖᒡ ᐋᐱᑎᓰᐎᓂᔨᐤ ᐋᐦ ᐋᔨᒧᑖᔨᒡ ᑭᔮᐦ ᐋᐦ ᐐᐦᑖᑯᓂᔨᒡ ᒑᒀᔨᐤ ᑭᔮᐦ ᒑ ᐹᑖᒡ ᒑᒀᔨᐤ ᐙᐦ ᐙᐱᐦᑎᔨᐙᒡ ᑭᔮᐦ ᒥᓯᓂᐦᐄᑭᓐᐦ ᒑ ᐙᐱᐦᑎᑭᓂᐎᐎᔨᒡᐦ, ᓂᒧᐃ ᐐᐦ ᒦᔥᑯᒋᐱᔨᐦᑖᑭᓂᐆ ᐊᓂᔮ ᐋᐦ ᐊᔨᒥᐦᐋᑭᓂᐅᐎᒡ ᐊᐙᓂᒌ ᑭᔮᐦ ᐐᒋᐦᐄᐙᒡ ᐊᓂᔮ ᐐᔨᐙᐤ ᑎᐱᔨᐙ ᒑ ᐱᒥᐱᔨᐦᑖᐙᑯᐱᓈ ᐊᓂᒌ ᐙᐦ ᐃᐦᑐᑎᐦᒡ ᐋᐦ ᒥᔖᔨᒡ ᐋᐱᑎᓰᐎᓂᔨᐤ᙮
ᐊᓂᒌ ᒑ ᓈᓈᑭᒋᔥᑖᐙᑯᐱᓈ ᐋᐦ ᐐᐦ ᒥᓈᒋᔥᑖᑭᓂᐎᐎᔨᒡ ᐊᔅᒌᔨᐤ, ᐊᓂᒌ ᓂᔮᓈᓈᑭᒋᔥᑖᒡ ᒑ ᐄᔑ ᑖᐦᑭᐦᐄᒑᐱᔨᒡ ᐋᐱᑎᓰᐎᓂᔨᐤ ᑭᔮᐦ ᐅᑖᐦ ᐅᐦᒋ ᑳᐦᓈᑖᐦ ᑎᐹᔨᐦᒋᒑᓰᓈᐦᒡ ᐙᐦᒋ ᓈᓈᑭᒋᔥᑖᑭᓂᐎᒡ ᒑ ᒌᐦ ᒥᓈᒋᔥᑖᑭᓂᐎᒡ ᐊᔅᒌ ᒨᔥ ᐐᐱᒡ ᒑ ᐐᐦ ᒋᔅᒑᔨᐦᑎᔨᐙᒡ ᐋᑎ ᐃᔨᔅᐱᔨᔨᒡ ᒦᓐ ᒌᐦ ᑭᓂᐙᐱᐦᑎᐦᒀᐙ ᐊᓂᑎᐦ ᓂᑐᐙᐱᐦᒋᑭᓂᐦᒡ ᒫᓯᓂᐦᐋᒡ᙮ ᐅᑖᐦ ᑯᐯᒃ ᑎᐹᔨᐦᒋᒑᓰᓈᐦᒡ ᐋᐦ ᐅᐦᒋ ᓈᓈᑭᒋᔥᑖᑭᓂᐎᒡ ᐊᔅᒌ, ᒌᔑᒄ ᔖᔥ ᓈᔥᒡ ᐄᔨᐦᒡ ᐋᐦ ᐄᔅᐱᔨᒡ, ᓂᑑᐦᐅᐎᓐ ᑭᔮᐦ ᐊᓂᑎᐦ ᓈᔥᒡ ᐋᐦ ᐐᐦ ᓈᑭᑎᐙᔨᐦᑖᑯᐦᒡ ᐊᔅᒌ ᑭᔮᐦ ᐋᔨᒧᑎᒧᒡ ᓂᑐᐙᐱᐦᒋᑭᓂᐦᒡ ᐋᑎ ᐃᔨᔅᐱᔨᔨᒡ ᒑᒀᔨᐤ ᐋᐦ ᑎᐹᑎᑖᔨᒡ᙮
ᑳ ᐱᐳᓂᔨᒡ 2019 ᑳ ᐄᒋᔥᑖᔨᒡ, ᐅᒌ ᑳ ᑭᒑᔅᒋᒫᒑᒡ ᒌᐦ ᐅᔑᐦᑖᐎᒡ ᒥᓯᓂᐦᐄᑭᓂᔨᐤ ᐋᐦ ᐐᐦᑖᑯᓂᔨᒡ ᒑ ᐄᔑ ᑖᐦᑭᐦᐄᒑᐱᔨᔨᒡ ᐋᐱᑎᓰᐎᓂᔨᐤ ᒑ ᐄᔑ ᓈᓈᑭᒋᔥᑖᑭᓂᐎᐎᔨᒡ: ᐊᓂᔮᐦ ᒑ ᑖᐦᑭᐦᐅᑯᔨᒡᐦ ᒑ ᐐᒋᐦᐄᐙᔨᒡᐦ ᐅᑖᐦ ᒉᐃᒥᔅ ᐯᐃᐦ ᐄᑖᐦᒑ ᐋᐱᑎᓰᓈᓂᐎᐎᔨᒑ᙮ ᐃᐦᑎᑯᓐ ᒥᔥᑎᐤ ᐐᐦᑎᒫᒑᐎᓐ, ᑭᔮᐦ ᒥᒋᓐ ᐐᐦᑖᑯᓐ ᐋᔑᓈᑯᐦᒡ 22 ᐱᔅᑭᑎᓯᓂᐦᐄᑭᓐ ᓂᔅᑯᒧᐎᓂᐦᒡ ᒑ ᐄᔅᐱᔨᐦᑖᑭᓂᐎᒡ ᑭᔮᐦ ᐊᓂᒌ ᒑ ᐐᒋᐦᐄᐙᐙᑯᐱᓈ ᐋᔨᒧᑖᔨᒑ ᐊᓂᔮ ᐙᐦ ᐄᔑ ᐋᐱᑎᓰᓈᓂᐎᐎᔨᒡ᙮