ᒑ ᐄᔅᐱᔨᐦᑖᑭᓂᐎᒡ 22 ᐱᔅᑭᑎᓯᓂᐦᐄᑭᓐ
ᐊᓂᑎᐦ 22 ᐱᔅᑭᑎᓯᓂᐦᐄᑭᓂᐦᒡ ᒫᓯᓈᑖᒡ ᐅᐦᒋ ᐋᐦ ᐐᐦ ᒥᓈᒋᔥᑖᑭᓂᐎᒡ ᐊᔅᒌ ᑭᔮᐦ ᐋᐦ ᐄᔑ ᑖᐦᑭᐦᐄᒑᐱᔨᒡ ᐱᒫᑎᓰᐎᓂᐦᒡ ᑭᔮᐦ ᒦᓐ ᒑ ᑭᓂᐙᐱᐦᑎᑭᓂᐎᒡ ᐅᐦᒋ ᒑ ᐄᔑ ᓂᐦᐄᐱᔨᐦᐄᐙᒡ ᐅᑖᐦ ᐊᑎᒫᐲᓯᒻ ᓃᔓᔨᒡ ᐋᐦ ᐅᐦᒋ ᑭᓂᐙᐱᐦᑎᑭᓂᐎᒡ:
ᒑ ᐐᐦ ᒋᔅᒋᓯᓈᓂᐎᒡ:
- ᐋᑯᑖᐦ ᐋᔑᓈᑯᐦᒡ ᐊᓂᑎᐦ 22 ᐱᔅᑭᑎᓯᓂᐦᐄᑭᓂᐦᒡ ᔮᔨᑖ ᒑ ᑭᓂᐙᐱᐦᑎᑭᓂᐎᒡ᙮
- ᐊᑎᑎᐤ ᒑ ᐊᔥᒋᐱᔨᐦᐋᑭᓂᐅᐎᒡ ᐄᔨᔨᐅᒡ ᒑ ᐐᒋᐦᐄᐙᒡ ᐄᔥᐱᔑᐐ ᑯᑎᑭᒡ ᐊᐙᓂᒌ ᐅᑎᐦ ᑯᐯᒃ᙮
- ᒑ ᒑᔥᑎᓈᒋᔥᑖᔨᒡ ᔮᔨᑖ ᒑ ᒥᑐᓈᔨᒫᑭᓂᐅᐎᒡ ᐄᔨᔨᐅᒡ ᐄᔅᑯᑎᒃ ᐱᒥᐱᔨᐦᑖᑭᓂᐎᐎᔨᒑ ᐅᔮ ᒑ ᐄᔅᐱᔨᐦᑖᑭᓂᐎᐎᔨᒡ᙮
ᐊᓐ ᒑ ᐄᔑ ᐱᒻᐱᔨᐦᑖᑭᓂᐎᒡ ᐊᓐ 22 ᑳ ᐄᑎᓯᓈᑖᒡ ᐱᔅᑭᑎᓯᓂᐦᐄᑭᓐ ᐊᓂᑖᐦ ᐅᒋᒫᓈᐦᒡ ᐋᐦ ᐅᐦᒋ ᐎᔮᔨᐦᑖᑯᓯᒡ ᐋᐅᑯᓂᒡ ᒑ ᓈᓈᑭᒋᔥᑖᒡ, ᑭᔮᐦ ᑭᑎ ᐐᐦ ᑭᓂᐙᐱᐦᑎᑭᓂᐆ ᔮᔨᑖ ᓂᔥᑣᐤ ᒑ ᐱᒥᐱᔨᐦᑖᑭᓂᐎᒡ ᒑ ᓈᑭᑎᐙᔨᐦᑖᑯᐦᒡ:
ᐅᒋᒫᓈᐦᒡ ᐋᐦ ᐅᐦᒋ ᐋᐱᑎᔒᔥᑎᑭᓂᐎᒡ - 22 ᐱᔅᑭᑎᓯᓂᐦᐄᑭᓐ ᒉᐃᒥᔅ ᐯᐃᐦ ᓂᔅᑯᒧᐎᓂᐦᒡ
ᐙᒋᒫᐦᑭᐦᑎᐦᒡᐦ ᐄᔨᔨᐅᑎᐹᔨᐦᒋᒑᓯᐤ, ᑯᐯᒃ ᑭᔮᐦ ᑳᐦᓈᑖᐦ ᑎᐹᔨᐦᒋᒑᓯᐤ
- ᒑ ᐐᐦᑎᒧᐙᑭᓂᐅᐎᒡ ᐊᓂᒌ ᐙᐦ ᐱᒥᐱᔨᐦᑖᒡ ᐋᐱᑎᓰᐎᓂᔨᐤ ᔮᔨᑖ ᒑ ᐃᔮᔅᑭᐐᒡ ᐋᐦ ᓂᑑᒋᒑᔨᐦᑎᐦᒡ ᒑ ᐄᔑ ᑖᐦᑭᐦᐄᒑᐱᔨᔨᒡ ᐊᔅᒌᐦᒡ, ᓂᐲᐦᒡ ᑭᔮᐦ ᐱᒫᑎᓰᐎᓂᐦᒡ
- ᒌᔑ ᓈᓂᑑᒋᔅᒑᔨᐦᑎᐦᒀᐙ, ᒑ ᐎᔮᔨᐦᑎᐦᒡ ᑖᑆᐦ ᒑ ᐃᐦᑐᑎᒧᐙᒀ ᑭᔮᐦ ᒫᒃ ᐋᑳ ᒑ ᐃᐦᑐᑎᐦᒡ ᐊᓂᔮ ᑳ ᐱᑯᓵᔨᐦᑎᐦᒡ ᒑ ᐃᐦᑐᑎᐦᒡ
- ᒦᓐ ᒌᐦ ᑭᓂᐙᐱᐦᑎᐦᒀᐙ, ᒑ ᐎᔮᔨᐦᑎᐦᒡ ᒑ ᓂᐦᐋᔨᐦᑎᒥᐦᐄᐙᔨᒀ ᑭᔮᐦ ᒫᒃ (ᐋᑳ) ᑭᔮᐦ ᐊᓂᔮ ᔮᔨᑖ ᒑ ᓈᑭᑎᐙᔨᐦᑖᑯᓂᔨᒡ ᒑ ᒋᔅᒑᔨᐦᑎᔨᐙᒡ᙮
ᒥᔮᒨᐱᔥᑎᐦᒡ ᐋᔑ ᑖᐦᑭᐦᐄᒑᐱᔨᔨᒡ ᐊᔅᒌᐦᒡ ᑭᔮᐦ ᐱᒫᑎᓰᐎᓂᐦᒡ ᒑ ᐄᔅᐱᔨᐦᐄᐙᔨᑯᐱᓈ
- ᓃᔥᑎᒻ ᑳᓂᐙᐱᐦᑎᐦᒡ ᐊᓂᔮ ᑳ ᐄᔑ ᐐᐦᑎᒥᔨᒡᐦ ᐊᓂᔮᐦ ᐙᐦ ᒋᔥᒋᐱᔨᐦᑖᔨᒡᐦ ᐋᐱᑎᓰᐎᓂᔨᐤ ᑭᔮᐦ ᐙᐦᑎᒧᐙᒡ ᐊᓂᔮᐦ ᐅᒋᒫᐤᐦ ᓈᑎᐙᔨᐦᑖᑯᓂᔨᒀ ᒦᓐ ᒑ ᑭᓂᐙᐱᐦᑎᑭᓂᐎᐎᔨᒡ (ᑭᔮᐦ ᒫᒃ ᓂᒥᒫᐦ);
- ᒋᑭ ᒌᐦ ᒫᒧᐎᓂᐙᐎᒡ ᑭᔮᐦ ᒋᑭ ᒌᐦ ᐊᔨᒥᐦᐋᐎᒡ ᐊᐙᔨᐤᐦ ᐊᑎᑎᐤ ᐐᐦ ᒋᔅᒑᔨᐦᑎᐦᒀᐙ ᒑᒀᔨᐤ ᐅᐦᒋ ᐊᓂᔮ ᐙᐦ ᐄᔑ ᐋᐱᑎᓰᓈᓂᐎᐎᔨᒡ (ᒑ ᓈᑭᑎᐙᔨᐦᑎᐦᒡ ᐋᔅᐱᔨᐦᑖᒡ ᐃᐦᑐᑎᐦᒀᐙ);
- ᓂᑎᐙᔨᐦᑖᑯᓂᔨᒑ, ᒑ ᐐᐦᑎᐦᒡ ᐊᓂᔮ ᐐᔨᐙᐤ ᐋᑖᔨᐦᑎᐦᒡ ᒑ ᒥᔪᐱᔨᐦᐄᐙᔨᒡ ᐅᐦᒋ ᐋᐦ ᐐᐦ ᒥᓈᒋᔥᑖᑭᓂᐎᐎᔨᒡ ᐊᔅᒌᔨᐤ ᑭᔮᐦ ᐱᒫᑎᓰᐎᓂᔨᐤ ᑭᔮᐦ ᐋᑖᔨᐦᑎᒥᐦᐄᐙᔨᒡ ᐅᑖᐦ ᐅᐦᒋ ᐅᒋᒫᓈᐦᒡ᙮
ᒥᔮᒨᐱᔥᑎᐦᒡ ᐋᔑ ᑖᐦᑭᐦᐄᒑᐱᔨᔨᒡ ᐊᔅᒌᐦᒡ ᑭᔮᐦ ᐱᒫᑎᓰᐎᓂᐦᒡ ᒑ ᐄᔅᐱᔨᐦᐄᐙᔨᑯᐱᓈ ᑭᔮᐦ ᐅᑖᐦ ᐅᐦᒋ ᑳᐦᓈᑖᐦ ᑎᐹᔨᐦᒋᒑᓰᓈᐦᒡ ᒦᓐ ᒑ ᑭᓂᐙᐱᐦᑎᑭᓂᐎᐎᔨᒡ-ᐲᓯᒸᐦᑖᐦᒡ
- ᒦᓐ ᒑ ᑭᓂᐙᐱᐦᑎᐦᒡ ᐊᓂᔮ ᑳ ᐄᔑ ᐐᐦᑎᒥᔨᒡᐦ ᒑ ᐄᔑ ᑖᐦᑭᐦᐄᒑᐱᔨᔨᒡ ᐊᔅᒌᐦᒡ ᑭᔮᐦ ᐱᒫᑎᓰᐎᓂᐦᒡ ᑳ ᐱᒋᔅᑎᓂᒥᔨᒡᐦ ᐊᓂᔮᐦ ᐙᐦ ᐃᐦᑐᑎᒥᔨᒡᐦ ᐋᐱᑎᓰᐎᓂᔨᐤ;
- ᒑ ᐎᔨᐱᔨᐦᑖᒡ ᐋᐦ ᐋᔨᒥᐦᐋᑭᓂᐎᐎᔨᒡᐦ ᑭᔮᐦ ᐋᐦ ᐙᐐᐦᑎᒫᒑᓂᐎᐎᔨᒡ ᐊᓂᔮ ᒦᓐ ᑳᓂᐙᐱᐦᑎᑭᓂᐎᐎᔨᒡ ᐃᔅᑯᑎᒃ ᐋᐱᑎᓰᓈᓂᐎᐎᔨᒑ (ᒑ ᓈᑭᑎᐙᔨᐦᑎᐦᒡ ᐋᔅᐱᔨᐦᑖᒡ ᐃᐦᑐᑎᐦᒀᐙ)
- ᒑ ᐐᐦᑎᐦᒡ ᐊᓂᔮ ᐐᔨᐙᐤ ᐅᑎᑖᔨᐦᑎᒧᐎᓂᐙᐤ ᐊᑎᑎᐤ ᒑ ᒌᐦ ᒥᔪᐱᔨᐦᐄᐙᔨᒡ ᐊᓂᔮᐦ ᑳ ᓂᐦᐋᔨᐦᑖᑯᓂᔨᒡᐦ ᒑ ᐃᐦᑐᑎᑭᓂᐎᐎᔨᒡᐦ ᐋᐱᑎᓰᐎᓐᐦ (ᑭᔮᐦ ᒫᒃ ᐋᑳ ᐅᐦᒋ ᓂᐦᐋᔨᐦᑎᒥᐦᐄᐙᔨᒡᐦ), ᑭᔮᐦ ᒑ ᐐᐦᑎᒧᐙᒡ ᐊᓂᔮᐦ ᐅᒋᒫᐤᐦ ᐊᓂᔮ ᒑ ᐃᐦᑐᑎᑭᓂᐎᐎᔨᑯᐱᓈ ᑭᔮᐦ ᒑ ᒌᐦ ᐄᔑ ᒦᓄᐱᔨᐦᑖᑭᓂᐎᐎᔨᒡ (ᓂᑎᐙᔨᐦᑖᑯᓂᔨᒑ);
- ᒑ ᐹᔣᔨᐦᑎᐦᒡ ᒦᓐ ᒑ ᐋᔨᒸᐅᐦᐄᐙᔨᒡ ᐅᐦᒋ ᐅᔮ ᐋᐱᑎᓰᐎᓂᔨᐤ ᒑ ᒌᐦ ᓂᐦᐋᔨᐦᑎᒥᐦᐄᐙᔨᒡ ᑭᔮᐦ ᒑᒀᔨᐤ ᒑ ᓈᓈᑭᒋᔥᑖᑭᓂᐎᐎᔨᒡ᙮
- ᒑ ᐃᐦᑐᑎᑭᓂᐎᒡ 1: ᒑ ᐋᔥᑎᓂᑭᓂᐎᒡ ᐋᐦ ᒥᓯᓈᑖᒡᐦ ᐊᓂᐦᐄ ᐋᐱᑎᓰᐎᓐᐦ ᔮᔨᑖ ᒑ ᓈᓂᑑᒋᔅᒑᔨᐦᑖᑯᐦᒡᐦ ᑭᔮᐦ ᒦᓐ ᒑ ᑭᓂᐙᐱᐦᑎᑭᓂᐎᒡᐦ
- ᒑ ᐃᐦᑐᑎᑭᓂᐎᒡ 2: ᒑ ᒥᓯᓂᐦᐄᑭᓂᐎᒡᐦ ᐊᓂᐦᐄ ᐙᐦ ᐃᐦᑐᑎᑭᓂᐎᒡᐦ ᐋᐱᑎᓰᐎᓐᐦ ᐋᑳ ᒑ ᓈᓂᑑᒋᔅᒑᔨᐦᑖᑯᐦᒡᐦ ᑭᔮᐦ ᐋᑳ ᒦᓐ ᒑ ᑭᓂᐙᐱᐦᑎᑭᓂᐎᒡᐦ
- ᒑ ᐃᐦᑐᑎᑭᓂᐎᒡ 3: ᓅᒻ ᐋᐦ ᐐᐦᑖᑯᐦᒡ ᐋᔑᓈᑯᐦᒡ ᐊᓐ ᒑ ᐄᔑ ᑖᐦᑭᐦᐄᒑᐱᔨᒡ ᐊᔅᒌᐦᒡ ᑭᔮᐦ ᐱᒫᑎᓰᐎᓂᐦᒡ
ᐋᐦ ᓅᑯᐦᑖᑭᓂᐎᒡ ᒑ ᐄᔑᓈᑯᐦᒡ ᐱᒥᐱᔨᐦᑖᑭᓂᐎᐎᒑ 22 ᐱᔅᑭᑎᓯᓂᐦᐄᑭᓐ
ᐊᓐ ᒑᒀᓐ ᑳ ᐐᐦ ᐱᒥᐱᔨᐦᑖᑭᓂᐎᒡ ᐋᑳ ᒥᓯᓈᑖᒡ ᒑ ᐃᐦᑐᑎᑭᓂᐎᒡ ᐊᓂᑎᐦ 1 ᑭᔮᐦ ᒫᒃ 2 ᒉᐃᒥᔅ ᐯᐃᐦ ᓂᔅᑯᒧᐎᓂᐦᒡ 22 ᑳ ᐄᑎᓯᓈᑖᒡ ᐱᔅᑭᑎᓯᓂᐦᐄᑭᓐ ᐊᓂᑖᐦ ᐅᐦᒋ ᐋᔑ ᑖᐦᑭᐦᐄᒑᐱᔨᒡ ᐋᐱᑎᓰᐎᓐ ᐋᐦ ᐐᐦ ᒥᓈᒋᔥᑖᑭᓂᐎᒡ ᐊᔅᒌ ᑭᔮᐦ ᐱᒫᑎᓰᐎᓐ, ᐊᓂᑎᐦ ᐙᐦᒋ ᐐᐦᑎᑭᓂᐎᒡ ᑖᑆᐦ ᒑ ᐃᐦᑐᑎᑭᓂᐎᒀ ᐋᐱᑎᓰᐎᓐ ᐋᐦᒸᔮᐦ ᓈᓂᑑᒋᔅᒑᔨᐦᑖᔨᐦᑖᑯᐦᒡ ᒑ ᐄᔑ ᑖᐦᑭᐦᐄᒑᐱᔨᒡ᙮ ᐋᑯᑖᐦ ᑭᔮᐦ ᐙᐦᒋ ᐐᐦᑎᑭᓂᐎᒡ ᐊᓐ ᐹᑯᓵᔨᐦᑖᑯᐦᒡ ᑳ ᐄᔑ ᒥᓯᓂᐦᐄᑭᓂᐎᒡ ᒑ ᐄᔑ ᑖᐦᑭᐦᐄᒑᐱᔨᒡ ᐊᔅᒌᐦᒡ ᑭᔮᐦ ᐱᒫᑎᓰᐎᓂᐦᒡ ᐋᐦ ᐋᔨᒧᑖᒡ᙮ ᐋᑯᑖᐦ ᒑ ᐅᐦᒋ ᐎᔮᔨᐦᑖᑯᐦᒡ ᑖᑆᐦ ᒑ ᐃᐦᑐᑎᑭᓂᐎᐎᒀ ᐊᓐ ᑳ ᐄᔑ ᐐᐦᑎᑭᓂᐎᒡ ᐊᓐ ᐋᔑ ᐱᑯᓵᔨᐦᑖᑯᐦᒡ ᒑ ᐃᐦᑎᓈᓂᐎᒡ ᐅᑖᐦ ᐄᔑ ᐅᒋᒫᐎᓂᓈᐦᒡ᙮ ᓂᑎᐙᔨᐦᑖᔨᐦᑖᑯᐦᒑ ᒫᒃ ᒦᓐ ᒑ ᑭᓂᐙᐱᐦᑎᑭᓂᐎᒡ (ᐊᓐ ᑭᔨᑆ ᑳ ᐄᔑ ᐐᔓᐙᓂᐎᒡ) ᐋᑯᑎᐦ ᒑ ᑭᓂᐙᐱᐦᑎᑭᓂᐎᒡ ᐊᓐ ᐙᐦ ᐄᑖᐱᑎᓰᓈᓂᐎᒡ ᐄᔅᑯᑎᒃ ᒌᐦ ᐱᒋᔅᑎᓂᑭᓂᐎᒀᐙ ᐊᓂᐦᐄ ᒥᓯᓂᐦᐄᑭᓐᐦ ᓈᑎᐙᔨᐦᑖᑯᐦᒡ᙮ ᒦᓐ ᒫᒃ ᒌᐦ ᑭᓂᐙᐱᐦᑎᑭᓂᐎᐎᒑ, ᐊᓂᒌ ᑳ ᑭᓂᐙᐱᐦᑎᐦᒡ ᒑ ᐐᐦᑎᒧᐙᒡ ᐊᓂᔮᐦ ᐅᒋᒫᐤᐦ ᐊᓂᔮ ᐋᔑ ᐱᑯᓵᔨᐦᑖᑯᓂᔨᒡ, ᑭᔮᐦ ᐋᑯᑎᐦ ᒑ ᒋᔥᒋᓈᒋᔥᑖᔨᒡ ᐊᓂᔮ ᒑ ᐄᔑ ᐎᔮᔨᑖᑯᓂᔨᒡ ᑖᑆᐦ ᒑ ᐋᐱᑎᓰᓈᓂᐎᐎᔨᒀ ᑭᔮᐦ ᔮᔨᑖ ᒑ ᐃᐦᑐᑎᑭᓂᐎᒡ ᐊᓐ ᓈᑎᐙᔨᐦᑖᑯᐦᒡ ᒑ ᑭᓂᐙᐱᐦᑎᑭᓂᐎᒡ, ᐃᐦᑎᑯᐦᒑ ᑭᔨᑆ᙮
ᐄᔅᑯᑎᒃ ᒋᐦᒋᐙ ᓂᐦᐋᔨᐦᑎᒥᐦᐄᐙᒑ, ᑭᔮᐦ ᒫᒃ ᐋᑳ ᐱᑎᒫ ᓂᑎᐙᔨᐦᑖᑯᐦᒑ ᒥᒋᓐ ᒑ ᑭᓂᐙᐱᐦᑎᑭᓂᐎᒡ, ᒀᔣᓐ ᒦᓐ ᑯᑎᒡ ᒑᒀᓐ ᒋᑭ ᓂᑎᐙᔨᐦᑖᑯᓐ ᐱᑎᒫ ᒑ ᐃᐦᑐᑎᑭᓂᐎᒡ ᐋᐦᒸᔮᐦ ᒋᔅᒋᐱᔨᐦᑖᑭᓂᐎᒡ ᐊᓐ ᐋᐱᑎᓰᐎᓐ᙮